تولّد ميّت عاش مع الموتى باش يموت

خرّج من كرش أمو بكاء حبى زاد عامين ومشى دخل المكتب قرى تعدى على الليسي وين فهم الجزء الاول من الحياة حب مارقدش بكاء زاد كتب عاود بكاء مشى سكّر زاد بكى نساها مشات عرف غيرها كيف كيف مشاة زاد قدم خوة القدام زاد قرى تخرّج ولى مهندس محامي صحفي طبيب ....

زاد حط الساق الثانية كبّر ولازم يلوّج على خدمة حبها يحب يعرّس ماثماش خدمة زاد حبها صبرت تقابلو بالسرقة سمع بوها قال لخوها هو قعد يحبها هي عرسّت براجل أخر هو قعد يحبها ويحب يلقى خدمة باش ميضيّعش الوقت خطب الدبوزة أرجع غدوة زيد صّب كاس الشهر الجاي شعّل سيغارو مطلوب ثلاثة سنوات خبرة لقى تربص مغلّق تمرمد سكن وحدو مازال يحبها صب كاس الايام تجري ماخلصش طردوه هي معادش تحبو تحب ولدها هو مازال يجري وراء مكتب التشغيل و على غفلة يطلع صوت وسط الناس ينادي بالقوي ويبكي :

مات فارق الحياة غادرنا الله يرحمو في الجنة أن شاء الله عمل برشة باهي 

الناس الكل بصوت واحد :

كيفاش؟ وقتاش؟ يا خسارة علاش أش صار؟ زعمة عمل الباهي في الجنّة ولا في النار ؟ يا خسارة مسكينة امو مساكن صحابو الله غالب 

هو من بعيد يتفرّج وما ينجم يجاوب حد عرّقان دايخ شايح مريض موجوع تاعب حزين فرحان لانو ارتاح من معترك الحياة اما ماذابيه كان زاد شوية فطر بجنب امو باس خواتو خرج معاها هي  في ليلة القمرة ضواية والنجوم عالية وحكالها خرافة على المحبة اللي ماتموتش باسها على خدها عنقها شم ريحتها بكى بالشهقّة شطّح معاها وعلى أكتافها غمّض عينيه ورقد 

علاش مش حد أخر؟ عمرو خمسين ستين سبعين ثمانين علاش في الوقت هذا علاش انا ؟علاش في العشرين استنى شوية سيّبني نرجعلهم نقلهم كل شي نقول الحقيقة خليني نمشي 

يرّجع عليه صوت من السماء وسط هليلة بيضاء نور عظيم حاجة ما يتصورهاش عقل صوت يشبه البوق قريب لناقوس و حنين كالكمنجة :

مكتوب يا فلان لازم تموت النهار هذا في الساعة هذي في الدقيقة هذي في الثانية هذي بالضبط انت بالذات 

يرجّع هو بصوت مخنوق :

ظعلاش أنا ؟مش هذا ولا هذا ولا هذا علاش توة ؟علاش في العمر هذا 

نفس الصوت يجاوبو بنبرة صعيبة شوية وأحن ببرشة:

ماثماش علاش انا اخترت انا قررت انا نفّذت مشى في بالك عمرك ملك و الدنيا تعمل فيها لتحب هيا اسكت معادش وقت لازم نشوف دوسيك 

يجاوب هو تحسو مستّغرب شوية :

معادش بكري ودوسي أش فمة أش صار ؟

 يجاوب نفس الصوة :من غير اسئلة لي كتّب صار

باهي معادش حاشتي باش نعرف و شنية الفرق كان عرفت ولا ماعرفتش اما قبل ما تحل الدوسي أقرى العنوان فماش ما تفهم حكايتي 

نفس الصوت يجاوبو  بضحكة طويلة : 

عنوان اما عنوان هاني نشوف في اسمك واسم بوك واسم امك وتاريخ الولادة والديانة و مان الاقامة و ينو العنوان اقراهولي يا فلان 

هو : ممكن العنوان ماهوش مكتوب اما تكتب بحروف من الماء مممكن سخانة الموت شيحتهم العنوان اخترتو انا و كتبتوا انا العنوان هو ملخص حياتي الي عنوانها : 

" تولّد ميّت عاش مع الموتى باش يموت"